विमानस्थल सञ्चालनमा नआउँदा पर्यटन व्यवसाय खस्किँदै
कञ्चनपुर, ४ माघ ।
दुई दशकअघिदेखि बन्द अवस्थामा रहेको कञ्चनपुरको मझगाउँ विमानस्थल सञ्चालनमा आउन नसक्दा यस क्षेत्रको पर्यटन व्यवसाय खस्किँदो अवस्थामा पुगेको छ । विमानस्थल सञ्चालन नहुँदा यहाँका महत्वपूर्ण पर्यटकीयस्थल ओझेलमा परेका छन् ।
हवाई सेवा प्रभावित भएकै कारण यहाँ विदेशी पर्यटकको सङ्ख्या शून्य जस्तै रहेकोे छ । करोडौँ रुपैयाँ खर्चिएर निर्माण गरिएको विमानस्थलका भौतिक संरचना जीर्ण भएका छन् ।
हवाई मैदान स्थानीय बासिन्दाको गाईगोरु चराउने क्षेत्र बनेको छ । हवाई मैदानमा रहेको ‘रन वे’ गाडी सिकारुहरुका लागि प्रशिक्षण केन्द्र बनेको छ ।
पर्यटन व्यवसाय प्रवद्र्धन गर्नका लागि हवाई यातायात महत्वपूर्ण भएकाले विमानस्थल सञ्चालन गर्न सरकारलाई पटक पटक आग्रह गर्दा सुनवाइ नै नभएको कञ्चनपुर उद्योग वाणिज्य सङ्घका निवर्तमान अध्यक्ष गणेशदत्त जोशीले बताउनुभयो । उहाँले हवाई यातायात नभएकै कारण यहाँका व्यवसायीहरुले पर्यटन व्यवसायमा लगानी गर्न नसकेको बताउनुभयो ।
“यहाँका शुक्लाफाँटा वन्यजन्तु आरक्ष, शिद्धबाबा, झिमिला ताल, बेदकोट ताल, विष्णु मन्दिरलगायतका पर्यटकीय क्षेत्र हवाई यातायातका कारण ओझेलमा परेका छन्” – उहाँले भन्नुभयो ।
हवाई यातायातको व्यवस्था नहुँदा यहाँ घुम्न आउने पर्यटकको सङ्ख्या नगन्य मात्रामा रहने गरेको नेपाल पर्यटन बोर्ड कार्यालय गड्डाचौकीका कर्मचारी स्थानेश्वर लेखकले बताउनुभयो ।
गत वर्ष सुदूरपश्चिम घुम्ने पर्यटकको सङ्ख्या दुईजना रहेकामा यस वर्षको हालसम्म यहाँ घुम्ने विदेशी पर्यटको सङ्ख्या शून्य रहेको उहाँले बताउनुभयो ।
“पर्यटन व्यवसाय प्रवद्र्धनका लागि हवाई यातायात महत्वपूर्ण रहेकाले बन्द विमानस्थल सञ्चालन गर्न सम्बन्धित निकायले चासो राख्नुपर्ने हुन्छ” – उहाँले भन्नुभयो ।
विसं २०२५ मा निर्माण गरिएको विमानस्थल सशस्त्र द्वन्द्वका कारण विसं २०५५ देखि बन्द अवस्थामा रहेको छ । यसैगरी, सुदूरपश्चिमका आधादर्जन बढी विमानस्थलमध्ये बाजुराको कोल्टी र कैलालीको गेटा विमानस्थल मात्रै सञ्चालनमा रहेका छन् ।
प्रतिकृया दिनुहोस्
Loading...
