Main News, News » सुदूरपश्चिममा अनन्ते पर्वको रौनक

बाजुरा ३१ भदौ ।

सुदूरपश्चिमका पहाडी जिल्लामा हिजोदेखि अनन्ते मेलाको रौनक छाएको छ । भदौ पूर्णिमाको अघिल्लो दिनबाट सुरु हुने अनन्ते मेला बाजुरा, अछाम, बझाङ, डोटी लगायतका जिल्लमा मनाउने चलन रहेको छ ।

बाजुरा जिल्ला वासीको दशैं र तिहार र भुवा पर्व पछिको तेस्रो ठूलो पर्वका रुपमा मानिने अनन्ते र चौदश मेलाको नामले पनि चिनिने यस पर्वमा तीन दिनसम्म देउडा खेलेर मनाउने परम्परा रहेको छ ।

महाभारतमा कौरवसँगको लडाइँमा पाण्डवहरुले गरेको विजय प्राप्तिको खुसियालीमा विजय उत्सवका रुपमा यो पर्व हरेक वर्ष मनाइने गरेको कुरा मार्तडी–४ का वृद्ध रुपसिंह रावलले जानकारी दिए।

‘अनन्ते मेला अन्यायको अन्त्य’ भन्ने शब्द अपभ्रंस भएर उत्पत्ति भएको किम्बदन्ती रहेको छ । व्रतबन्धमा अनन्तः धारण गर्ने परम्परा रहेकाले यो पर्व पूर्णिमाको दिनबाट सुरु गरेर भगवानको भजन कीर्तन र महापुरुषले गरेका कल्याणकारी कार्यलाई समुदायबीच गीत र मागलका गाथाको माध्यमद्वारा सुसूचीत गरिने परम्परा रहेको स्थानीय काल्चे दमाइले बताए ।

अनन्ते मेला अवधिभर मागल र गीत गाएर महाभारतको युद्धमा कौरव र पाण्डवबीचको युद्ध संवाद र युद्ध कुशलता जस्ता कार्यको वर्णन गरेको पाइन्छ । स्थानीय लोकसंस्कृति र जिल्लाको पहिचानस्वरुप मनाइने अनन्ते मेला जिल्लाका मार्तडी, जुगाडा, आटिचौर, बुढीगङ्गा, वाई लगायत एक दर्जन बढी गाविसमा धुमधामका साथ मनाइने गरिन्छ ।

देउडा संस्कृतिको जगेर्ना, आफन्तसँगको भेटघाट र मित्रताको सुरुवातको सङ्केतका रुपमा पनि यो पर्व मनाउने गरिएको स्थानीयवासीले बताउने गरेका छन् । मेलाको अवसर पारेर यतिखेर छिमेकी गाविस, लेक खर्कबेँसीबाट आफन्त, गोठाला, विद्यार्थी र कर्मचारी एक ठाउँ जम्मा हुने गरेका छन् ।

यो मेला सुदूरपश्चिमका अन्य ठाउँमा पनि मनाउने प्रचलन बढ्दै गएको छ भने जिल्लाको बाह्रबिस, कुल्देमाडौँ, ब्रहम्तोला लगायतका गाविसमा पनि विस्तार हुँदै गएको छ ।

यस अवसरमा खेलिने धमारी, रतेउली, पुत्ला लगायतमा महिला पुरुष गोलो घेरा बनाएर एकै तालमा खुट्टा बटार्दै दुई समूहमा सवालजवाफ गर्ने गरिन्छ । जसमा गीत सिर्जना गर्ने एक मुख्य व्यक्ति छनोट गरिएको हुन्छ ।