माग पूरा नभएसम्म नेपाल पत्रकार महासंघ काठमाडौं शाखाको कार्यालयमा जारी तालाबन्दी नखोल्ने संघर्षरत पक्षहरुले बताएका छन् ।

सोमबार तालाबन्दीबारे संघर्षरत पक्षहरुको तर्फबाट बुँदागत माग प्रस्तुत गर्दै पत्रपत्रिका मञ्च देवेन्द्र चुडालले सो जानकारी दिएका हुन् । चुडालले ७ बुँदे मागपत्र शाखाका अध्यक्ष गोविन्दप्रसाद चौलागाईँलाई बुझाएका छन् ।

शाखा अधिवेशनलाई दलीय स्वार्थमा प्रभावित पार्ने र क्रियाशील पत्रकारलाई निषेध गर्ने उद्देश्यले प्रक्रियाविपरीत शाखा सचिव रामकृष्ण अधिकारीले कीर्ते कागजात बनाई महासंघ केन्द्रमा सदस्य स्थानान्तर चिठी पेस गरेको र त्यसलाई महासचिव इन्द्रमान बुढा (उजिर मगर)ले स्वीकृत गरेर विधानलाई उल्लंघन गरेका कारण तालाबन्दी गर्नु परेको संघर्षरत संगठनका प्रतिनिधिहरुले बताए ।

सो शाखा र महासंघ केन्द्रबाट भएको विधान उल्लंघन गर्ने पदाधिकारीमाथि छानबिन र दोषीलाई विधानबमोजिम कारवाही नभएसम्म तालाबन्दी जारी रहने उनले बताए । माग सम्बोधन नभएसम्म शाखामा अधिवेसन हुन नसक्ने प्रेस चौतारीका विष्णु आचार्यले बताए । ‘नयाँ सदस्यता र स्थानान्तरणको विषय नसुल्झिएसम्म चुनाव हुन दिँदैनौं’ आचाले भने ।

त्यसैगरी क्रान्तिकारी पत्रकार संगठन नेपालका रामशरण माझीले शाखाका सचिव अधिकारी र केन्द्रका महासचिव मगरले गरेको गल्ती नसच्याएसम्म र गल्ती नदोहोर्याउने लिखित प्रतिवद्धता नआएसम्म तालाबन्दी कार्यक्रमलाई निरन्तरता दिने बताए । उनले भने ‘गलत तरिकाबाट गरिएको सदस्यता स्थानान्तरण र नयाँ सदस्यताको विषय टुंगो नलागेसम्म अधिवेसन हुनै सक्दैन ।’

डेढ हप्तादेखि तालाबन्दीसहित संघर्षरत पक्षसँग वार्ता गर्न शाखा कार्यसमितिले अध्यक्ष चौलागाईँलाई जिम्मेवारी दिएयता आजको औपचारिक छलफलमा मागपत्र प्रस्तुत भएको हो । मागपत्रको बोधार्थ नेपाल पत्रकार महासंघ केन्द्रलाई पनि दिइएको छ ।

शाखा सचिव अधिकारीले नयाँ सदस्यता वितरणमा गैरपत्रकारलाई काखी च्याप्ने र अध्यक्षलाई थाहै नदिई शाखामा ५० जनाभन्दा बढीलाई विधानविपरीत विभिन्न शाखा र प्रतिष्ठानबाट सदस्य स्थानान्तरण गरेपछि असन्तुष्ट पक्षहरुल कार्यालयमा तालाबन्दी गरेका थिए । सचिव अधिकारी स्थानान्तरण विषयमा कीर्ते धन्दामा लागेपछि कार्यसमिति र बाहिर चौतर्फी रुपमा आलोचित भएका छन् ।

२०७३ चैत्र ७ मा प्रकाशित ।