पार्टीको विधानबाट ‘हिन्दू राष्ट्र र राजसंस्था’ हटाइएको विरोधमा सोमबार दिउँसो निर्वाचन आयोग अगाडि प्रदर्शन गरिरहेका आफ्ना पार्टीका नेता तथा कार्यकर्तामाथि प्रहरीले बल प्रयोग गरेपछि आपूर्ति मन्त्री दिपक बोहरासहित अपराह्न बालुवाटार पुगेका मन्त्री थापाले शान्तिपूर्ण प्रदर्शनमा बल प्रयोग भएको भन्दै यस्तै अवस्था रहे सरकार छाड्ने चेतावनी दिएका हुन् ।

आफूहरुले गरिरहेको शान्तिपूर्ण प्रदर्शनमाथि प्रहरीले बल प्रयोग गरेको र आफ्ना पार्टीका नेता तथा कार्यकर्ता घाइते भएको जानकारी प्रधानमन्त्रीलाई गराउँदै थापाले निर्वाचन आयोगले गैरसंवैधानिक रुपमा आफ्नो विधानमाथि हस्तक्षेप गरेको र उल्टै गृह प्रशासनले शान्तिपूर्ण कार्यक्रममा दमन गर्ने भएपछि सरकारमा किन बस्ने ? भनी प्रश्न गरेको स्रोतले बतायो ।

निर्वाचन आयोगले निर्णयमा पुनर्विचार नगरे केही दिनमै सरकारबाट बाहिरिने चेतावनी दिँदै थापाले अगाडि भने– ‘निर्वाचन आयोगको असंवैधानिक र तानाशाही निर्णयको विरोधमा भएको शान्तिपूर्ण प्रदर्शनमा प्रहरीले दमन गरेको छ । म सरकारमा उपप्रधानमन्त्री छु, मेरै नेतृत्वमा भएको शान्तिपूर्ण कार्यक्रममा यस्तो हस्तक्षेप हुन्छ भने सरकारी सरकारमा बस्न सकिन्छ ? हामी निर्वाचन गराउन सरकारमा आएका हौं । तर, जब हामीलाई नै निर्वाचनमा जान रोकिन्छ भने सरकारमा बसेर जागिर खानुछैन् ।’

नेता कार्यकर्तामाथि बल प्रयोग भएपछि सिंहदरबारबाट सिधै आएर आफै निर्वाचन आयोग अगाडि धर्ना बसेका उपप्रधानमन्त्री थापा वीर अस्पतालमा उपचार गराइरहेका घाइते नेता तथा कार्यकर्तालाई भेटेर बालुवाटार पुगेका थिए ।